Letter 8021: Ad eundem pro pellibus transmissis

XXI Ad eundem pro pellibus transmissis Egregio conpacta situ, falerata rotatu atque Sophocleo pagina fulta sopho me arentem vestro madefecit opima rigatu, fecit et eloquio quod loquor esse tuo. dulcis care decens facunde benigne Gregori atque pater patriae, hinc sacer, inde cate, muneribus, meritis, animis et moribus aequis, omnibus officiis unde colaris habens: me Fortunatum tibi celso sterno pusillum, commendo et voto supplice rite tuum; cui das unde sibi talaria missa ligentur pellibus et niveis sint sola tecta pedis. pro quibus a domino detur stola candida vobis: qui datis hoc minimis, inde feratis opes.